مجمع سجون وادي النطرون

معظمنا شاف السيسي وهو بيستدعي اللواء سمير فرج من أبره (قبره) علشان يحكي للقيادات التشريعية والتنفيذية للدولة قصة سخيفة مفيش أم بتحكي زيها لطفلها عند النوم .. ومن الحكاية دي عرفنا إزاي الظباط بيتم تأييمهم وترئيتهم لما يقدروا يبدلوا شوربة العدس بالفول المدمس والجبنة النستو بحبنة الصفائح .. تفاهات وصغائر .. بينما أزمات ومشاكل مصر تزداد من ارتفاع الأسعار وضياع التعليم وغياب الصحة والتفريط في الأرض والجزر والغاز والماء وسرقة مناجم الدهب وبيع المصانع وتكميم الأفواه وغيره وغيره .. مضاف ليهم مصيبة جديدة أعلنها السيسي بنفسه وهي بناء مجمع محاكم وسجون وادي النطرون .. يا حفيظ يا رب .. حاجة فظيعة ومخيفة .. شيء يشيب له الولدان .. نقلوا لقصر الإتحادية نموذج منه علشان السيسي يتفرج عليه كل شوية .. حاجة كده ترضي نفسيته المريضة الانتقامية السادية .. مساحته على الطبيعة في قلب الصحراء ٥١٥ فدان ويتسع من غير زحام ل ٣٤٠٠٠ محجوز وحواليه أسوار خرسانية وأبراج حراسة كل برج يساع ٦ أو ٨ عساكر .. أول ما تشوف مبانيه تفتكر إنه مجمع لعشر جامعات .. لكن مفيهوش جامع لأن هدف السيسي من السجون هو حبس المواطن معزول بمفرده ويمنع عنه الأكل الآدمي والشمس والرياضة ويمنع عنه الزيارة أو يخليها جحيم وعذاب على أهله .. والمحاكم جنب الزنزانة لزء فمفيش فرصة حتى المحبوس يمشي خطوة أو خطوتين .. يعني السجن في عرف السيسي هو مرحلة تعذيب وانتآم وأتل مش زي زمان السجن تهذيب واصلاح وافتكروا عمل إيه في الرئيس محمد مرسي وفي الشاب الإيطالي جوليو ريجيني وغيرهم .. السيسي حيفتح مجمع محاكم وسجون وادي النطرون في خلال مدة أصيرة وأكيد حتكون هيصة وزفة وزمبليطة لأنه فرحان وعايز يرضي الأمريكان زي ماآل بنيت المجمع على حسب المواصفات الأمريكية .. ولا نستبعد إنه يدعي لحفل الإفتتاح مديرين لحقوق الإنسان وحتى وزراء ورؤساء دول واحنا عارفين مهما يلمّع في المجمع ولو حتى جهّز المجمع على مواصفات القصور اللي بيبنيها لعيلته فهو وعصابته همّه اللي حيتحكموا فيه والعينة باينة في سجن العقرب وطرة .. ويظهر المقاول نسي بناء مآبر جوه المجمع وآل أسيب حتة المآبر دي للسيسي وسفاحينه لأنه عارف تفكير السيسي: الداخل في سجوني مبيطلعش منها إلا على زينهم ..