عمال اليومية – الرسالة الثانية

مبقاش عندنا حتى فرصة نعيش... احنا لما كنا مبنشتغلش كنا بنجيب كام رغيف وحتى ناكلهم حاف احنا وولادنا... حتى ده مستكترينه علينا... تخيل يا مؤمن ... رغيف العيش اللي ساترنا مستكترينه علينا... عارفين القطر الكهربا الجديد تكلفته تأكل كل مصر عيش 10 سنين... لكن باين احنا كلاب ماحدش شايفنا.... احنا لازم نتشاف ومش هنتشاف واحنا كل واحد لوحده.. لازم نتجمع وطبعا مش هنعرف نجمع نفسنا كلنا... احنا كتير متبعترين في كل مصر.... احنا عمال تراحيل الزراعة واحنا عمال البنا وعمال النضافة وعمال البيوت وغيرهم وغيرهم ... علي فكرة ممكن نسكت لكن هييجي اليوم اللي فعلا هنختفي بجد احنا وعيالنا واهلنا.

كل مكان في مصر ... قرية ... مركز... قسم ... منطقة ... 3 اربعة رجالة فاهمين وشجعان يبتدوا يبنوا تجمع بسيط لكل عمال اليومية الموجودين ... خطوة أولى نبني فيها نفسنا في كل حته في مصر ... صدقونا ... مفيش حل غير كده ... هنعمل ايه وتجميعنا ده هيفيد في ايه ... خليك معانا واسمعنا وانت هتعرف... اهم حاجه تحمي نفسك والعدد الصغير اللي هتبتدي بيه وواحدة واحدة هنكبر ونتسمع ونتشاف وناخد حقنا وحق ولادنا.