عمال اليومية - الرسالة الأولى: لما كنا صغيرين معرفناش نكمل تعلمنا ولا عرفنا نتعلم صنعة... يمكن ظروفنا وظروف أهلن ماساعدتناش... يمكن فكرنا غلط ....يمكن محدش قالنا ولا نصحنا نعمل إيه.... ولا حكومة ولا ناس كبار ولا حتى الناس اللي حوالينا.... ومحدش كان مهتم يعلمنا واتيابنا لمصيرنا....بقينا بنجري ورا لقمة عيشنا يوم بيوم... صبح ولا ليل ... برد ولا حر... ...يوم نلاقي واتنين لا ... احنا كمان عندنا ولاد... عاوزينهم تبقى حياتهم أحسن مننا... يعيشوا من غير حساب كل يوم... عاوزينهم يكبروا ويتعلموا ويلعبوا... ما هو كل طفل محتاج يلعب كمان... إنا حته من البلد دي... ولينا حقوق احنا وولادنا... مش عاوزين اعانات ولا عاوزين عطف من حد... احنا عاوزين حقوقنا اللي مش شايفنها... عاوزين علي الأقل نعرف انتم شايفينا لينا حقوق وهي ايه.... إحنا عاوزين نحس إن البلد بلدنا مش عبيد فيها... مش عاوزين نرجع لولادنا كل يوم وشنا في الأرض مش عارفين نأكلهم... عارفين... احنا كثير أوي... احنا عمال البنا... عمال تراحيل الزراعية ... عمال بتشتغل اي حاجة وكل حاجة في أي وقت علشان لقمة العيش... مش لازم نفضل حاسيين اننا مش متشافين ولا حد حاسس بينا... لازم نتشاف والكل يعرف اننا حته من البلد ولينا حقوق.... لازم نحط ايدينا في ايد بعض ناخد حقنا المهدور...
