الرسالة التانية الفلاحين عرفنا سوا في رسالتنا الاولي ازاي احنا بنعاني ... ارضنا بتموت من العطش وبتموتنا معاها ... احنا وولادنا وكل مصر... مصر اللي كانت جنة بأرضها وخضارها ونخلها... صحيح احنا طول عمرنا متبهدلين ومحدش باصص لينا لاننا ناس غلابة... لا لينا حظ في تعليم في بلادنا ولا طرق ولا حتى مرافق.. لكن كنا راضيين بعيشتنا وبنربي ولادنا... احنا دلوقتي هنعمل ايه... هنستني أيه؟؟؟ احنا فلاحين ومزارعين مصر احنا عايشين في 5000 قرية مصرية نصهم حالتهم تصعب على أي حد عنده ضمير... فقر ومرض وعزلة... والي مش مصدق يلف ويشوف... يا رجالة مصر وشبابها... اللي عايشين في الخمس تلاف قرية... الاربعين مليون اللي محدش شايفهم ... مش هنفضل كده... البلد دي بلدنا والله ... واحنا خيرها وملحها... عاوزين نتشاف ... عاوزين نتعلم ونتعالج.. عاوزين أرضنا ترجع عفية و ترمي خيرها علينا... طول ما احنا ساكتين هنفضل كده ... عاوزين تعرفوا تعملوا ايه ... هقولكم نرجع اقويا تاني ازاي... مفيش حد بيتشاف لما يكون واقف بطوله لوحده ... طول ما انت لوحدك هتتفرم من غير ما تتشاف اصلا... محتاجين كل قرية في مصر يبتدي شبابها ورجالتها الاحرار يجمعوا بعض خمسة ولا سته في كل قرية يفكروا ويتناقشوا ويحموا بعضهم من غير ما يعملوا صياح وغاغه ... نفكر الاول ونبني نفسنا من غير ما حد يشوفنا من جواسيس النظام في كل حته العمدة والغفر وغيرهم... دي البداية ان يتعمل مجموعة متماسكة تكون هي نواة للي جاي بعد كده وتكبر مع الوقت بس مش دلوقتي... المهم الاول تنبي نفسها وتثبت رجليها على الأرض. وخد بالك ...الدنيا رايحة في سكة اسوأ وأسوأ وعمرها ما هتتعدل واحنا ساكتين وراضيين بالغلب والفقر. طول ما انت لوحدك محدش هيشوفك ... نجمع بعض ونبني مع بعض
